Bashkimi i pasurisë së gruas me atë të burrit

Pyetje:”A lejohet në islam që pasuria e gruas, ti bashkëngjitet asaj të burrit dhe së bashku të përballojnë jetesën?”



Shejh Xhadul Hak, ish shejhu i Ez’herit

Përgjigje:”Në origjinë, secili nga bashkëshortët duhet të ketë pavarësinë financiare. Por nëse pasuritë e tyre bashkohen në një, me miratimin e tyre, nuk prish punë. E theksojmë, se në orgjinë, secili nga bashkëshortët duhet të jenë të pavarur financiarisht dhe se shpenzimet e përditshme janë përgjegjësi vetëm e burrit.

Thotë shej Xhadul Hak, Ali Xhadul Hak, ish shejhu i Ez’herit, Zoti e mëshiroftë:

Islami, bazuar në Kuran dhe traditën profetike, ka vendosur barazi mes burrit dhe gruas pothuaj në gjithë të drejtat dhe detyrimet. Kështu, ai i ka njohur gruas të drejtën e pavarësisë financiare dhe personale. Kështu, gruaja ka të drejtë të mbajë mbiemrin e babait dhe familjes së saj edhe pas martese, ashtu siç ka të drejtë të ketë pasurinë e saj.

Lidhur me të drejtën për pavarësi financiare, në Kuran hasim një sërë ajetesh të cilat ia njohin gruas këtë të drejtë, cilado qoftë forma e lejuar e posedimit të kësaj pasurie. Thotë Zoti në Kuran:”Meshkujve u takon pjesë nga ajo që ua kanë lënë prindërit dhe të afërmit, por, edhe femrave u takon pjesë nga ajo që ua kanë lënë prindërit dhe të afërmit qoftë ajo pak apo shumë, si pjesë e caktuar dhe e detyruar.” (Nisa, 7)

“Mos i lakmoni ato gjëra, me anë të të cilave Allahu i ka bërë disa nga ju të dallohen mbi të tjerët: meshkujt do të kenë pjesë prej asaj që kanë punuar e po ashtu edhe femrat do të kenë pjesë prej asaj që kanë punuar.” (Nisa, 32)

Bazuar në këtë, juristët myslimanë kanë mendim unanim se dy bashkëshortët gëzojnë të drejtën e pavarësisë financiare. Akti i martesës i lejon burrit të shkojë në shtrat me të shoqen, por nuk i jep të drejtën të vërë dorë në pasurinë e saj. Sakaq, islami e obligon burrin të shpenzojë nga pasuria e tij gjithçka që i nevojitet gruas nga nevojat tradicionale të rrethit ku jeton. Asnjëri prej tyre nuk ka të drejtë të përdorë llogaritë apo pasuritë e tjetrit, përveç gjërave të vogla që nevojiten për jetesë brenda shtëpisë. Nëse bëhet bashkimi i pasurive mes burrit dhe gruas, kjo duhet të ndodhë vetëm me miratimin e dy palëve.